 |
| Ilustrasi Gambar: mozaik minang |
Disalin dari kiriman FB Zuchri Muchlis
MINANGKABAU
Dijapuik kisah nan lamo disilau riwayat tambo pangka sejarah adat kito.
Takalo mulak mulonyo tasabuik rajo nan baduo saibu balain ayah Indojati namo mandehnyo, nan tuo banamo Paduko Basa kudian bagala Datuak Katumangguangan anak Rajo Mauliwarman Dewa, adiaknyo banamo Ketek Sutan Balun anak dek Cati Bilang Pandai bagala Datuak Parpatiah Nansabatang.
Adopun Datuak Katumangguangan anak nan tongga dek ayahnyo, sedangkan Parpatiah Nansabatang urang baranam badunsanak kanduang saibu jo sa ayah.
Tasabuik Datuak nan baduo takato indak sasifat balain pi'ia jo pembawaan. satantang Datuak Katumangguangan urangnyo maha tak ta ago kok murah indak tabali gantiang putuih biang katabuak ditangan baliau tapaciknyo, baliau Parpatiah Nansabatang urangnyo bijak candokio pandai manarah manilantang cati marapek dalam aia bijak maurai manyalasai, manabang indak marabahkan mahampang tak sampai kamuaro kato mufakat mambatasi.
Dek pandai asa barasa dek tuah sunduik basunduik baliau datuak nan baduo samo maracik manarawang manjalin adat jo limbago, mangko dihimpun tangkai ciek-ciek disusun di atok-atok lalu digantuang ditiang tinggi disangkuik diparan panjang manjadi cupak nan piawai, diumpuak malah Minangkabau manjadi ba lareh-lareh. partamo lareh nan panjang banamo Koto Piliang kaduo lareh nan bunta tasabuik Bodi Caniago, dibuek luhak nan tigo, nan tuo Luhak Tanah Data lambangnyo Kuciang nan kuniang (tando batuah rang babanso), nan tangah iyolah Luhak Agam simbolnyo Harimau sirah (urang bagak bapandirian), nan bunsu Luhak limopuluah maskotnyo sikambiang hitam (urang nan tabah bijaksano saba jo rila pakaiannyo).
Nagari baniniak mamak kampuang dibari banantuo rumah nan gadang batungganai, tasusun takabek arek dikungkuang adat nan ampek dipapek cupak duo rupo kato ampek hukum pun ampek undang dibagi duo puluah. adopun inti pati adat pidoman hiduik kaditompang yaitu:
Bajalan di nan luruih
jalan salangkah madok suruik kok sasek diujuang jalan kumbali kapangka jalan.
Bakato di nan bana
mangecek usah panduto bajanji ijan pamunkia ikara dipagang taguah, kok pasan dipasampai pakirim dipalalu amanah dipaliaro.
Dalam bakorong jo bakampuang
jikok iduik jalang manjalang kok sakik silau manyilau kok mati janguak manjanguak,
tibo diburuak baambauan tibo nan elok baimbauan mandapek samo balabo kok jatuah samo tagamang.
Caro batani bausaho
kasawah basamo samo kaladang barampia ampia taranak samo dipauik baparak samo dipaga.
Caro basosial
lamak diawak katuju dek urang usah nan runciang nan dirauik, kok sayuik bilai mambilai kok kurang tukuak manukuak kok lai bari mambari. dalam badagang baniago, jikok maukua sampai-sampai kalau manimbang cukuik-cukuik jua bali batarang tarang ambiaklah untuang sadang elok.
Dalam bamasyarakaik
kaulu sarantak galah kailia sarangkuah dayuang tarapuang samo anyuik tarandam samo basah, saciok ibaraik ayam sadanciang umpamo basi kok bajalan mairiang kok baiyua maisi.
Sifat mamak
malam mandanga-dangakan siang mancaliak- caliakkan, hilang mancari luluih manyalami hanyuik maminteh, tibo dikalam kamanyigi tantang nan lakuang kamaninjau.
Adaik rang tuo
salah basapo batuka baanjak umpang manyisik, ijan bak kabau mahampang jalan indak nan gadang dari baniah indak nan tinggi dari pucuak arogan kecek rang kini.
Sifat kamanakan
mangecek siang mancaliak-caliak bakato malam mahagak-agak nak tau batanyo nak pandai baraja nan tuo diparmulia nan ketek disayangi samo gadang lawan baiyo.
Sifaik anak dagang
manyauak di ilia-ilia bakato dibawah- bawah dimano bumi dipijak disitu langik dijunjuang dima rantiang dipatah disitu aia disauak,
ijan batandang mambao lapiak.
Sifat parampuan
mato nan usah dipalia muluik nan ijan dipanyinyia bakato marandah kalua bamaso bajalan batolan tarimo suko dinan ado.
banyak nan lain, banyak kalau dibilang ciek ciek dikaka dirantang panjang dibaco sado nan paralu. tasimpan dalam pepatah talipek dalam patitih dikakeh mangko basuo dikambang barunyo nampak tiang dek kito mamahami, itulah Adat Minangkabau.
Kemudian Islam pun datang, sebelum mangaji sarugo jo narako diajakan elok jo buruak halal jo haram, mudarat jo mamfaat.
Mulonyo lai ta amalkan pituah lai taraguak sebab sabunyi dengan Adat, tapi dek caro panyampaian indak jo baso tutua kieh bukan bamisa jo umpamo tembak lansuang manuju tangkai, sahinggo cacek jo ragu pun tibo, datang paringek dari nan tuo "Islam kok kurang basitinah". urang pun tagagok manarimo tatagun langkah pangajian.
Maso bajalan juo, hubungan dagang tambah rami saudagar sarato da'i ado Arab ado Melayu banyak nan datang dari Siak daqwah pun makin sumarak. diajakan tauhid jo aqidah dikaji fiqih jo ibadah, ditunjuakkan sado nan paralu Mubah, ja'is sarato maqruh hadist jo Qur'an sandaranyo.
Mako naiak martabat urang Syara' tageser tuah niniak mamak timbul cemburu urang Adat, dek cameh taimpik pengaruhnyo turunlah pepatah peringatan "Awas urang batandang mambaok lapiak Limau ka kalah dek Binalu".
Dek bijak langkah urang Agamo mancaliak karuah kailiran dijalang kaulu banda, diubek hati nan tagisia disanjuang Pangulu jo Adat nyo, lunak lah hati urang adat manurun batamu pandang Adat elok Syara' pun rancak samo paralu kaduonyo. Sagandiang datuak jo ulama duduak dilapiak nan sahalai turunlah kato nan sabunyi tatuang di dalam pantun :
"Simuncak mati tarambau
kaparak mambao ladiang
lukolah pao kaduonyo
Adat jo syara' di minangkabau
sarupo aua dengan tabiang
sanda basanda kaduonyo".
Ulama balapang dado pangulu bahati lapang, surang turun surang mandaki batamu ditangah janjang. itulah nan dimukasuik dek bunyi pepatah "Syara' mandaki Adat manurun" sebagai lambang toleransi.
Akan tetapi, walau bagandiang samo basanda sagan manyagan kaduonyo. Agamo jalan jo Syara' nyo Adat malenggang jo cupaknyo urang nan indak satujuan, sungguahpun surau lah rami tapi pakau jo dadu jalan taruih manyabuang ayam balansuang juo minum tuak indak bakurang sijundai sabalik kampuang,
Alah tagak Amar ma'ruf tapi alun tacapai Nahi mungkar hutang tak lansai Alim ulama.
Mako lamo bakalamoan, bana nan tidak tabandiangi Adat kok tetap jo lazimnyo dipakai sekedar dek biaso, Syara' kuaso jo kawi nyo kato nan indak urak ungkai hukum bana bakato ciek. Itulahnyo bunyi undang "Adat nan Lazim Syara' nan kawi", Lazim sekedar dek biaso dirubah jo kawi kekuatan. Nan mungkar baransua hilang maksiat samakin lenyap nan Batil kalah dek nan Bana.
Akhirnyo Islam pun ditarimo hinggok Iman semakin taguah kukuah tauhid kian mancakam, Adat pun batambah kokoh tagak dibilai dek Agamo duduak basanda ke syari'at banamo Adat Islamiah sumarak alam Minangkabau.
Sampai masuak ke Istana kedalam daulat Pagaruyuang manjadi rajo tigo selo yaitu : Rajo Alam, Rajo Adat dan Rajo Ibadat, langkok jo basa ampek balai suduik nan ampek Minangkabau yaitu : Bandaro di sungai tarab, Indomo di saruaso, Makudun di Sumaniak dan Tuan kadi di Padang Gantiang. itulah kabinet Pagaruyuang, Sesudah semenjak itu berlaku Syari'at Islam, undangnyo dalam pepatah "Syara' mangato Adat mamakai".
Akhirnyo diateh bukik segitigo nan mangalang ka Tanah Data maunjua ka luhak Agam nan rusuaknyo ka luhak Limopuluah. Mufakatlah urang Minangkabau, itulah inyo "Piagam Marapalam" lah talatak tiang di sandi manjadi undang sampai kini yaitu "Adat Basandi Syara', Syara' Basandi Kitabullah".
Bak ijuak nan sabalambang Agamolah tulang saga nyo, umpamo badan batang tubuah syara' lah nyao manggarakkan. jikok nyampang syara' manjauah-jauah Adat kajadi buah dendang elok bunyi lamak tadanga hilang makna hakekatnyo bakcando buyiah guluang ombak.
Itulah Rahmat tak ternilai dari cancang jo tarah urang dahulu, berbahagialah umat Minangkabau mamakai "Adat Basandi syara', Syara' Basandi Kitabullah" hiduik mati dunia akhirat mamagang telong lahia bathin tak mungkin kasasaek lai.
Namun sanyao Adat jo Syara' ado bahinggo jo babateh bukan bak garam dalam aia, sebagai buah fikiran adat lah nyato jangkauanyo pedomanyo alua jo patuik dasarnyo kato mufakat sifatnyo mancari bana, Sedangkan Islam buatan Allah pedomanyo sunah Rosul dasarnyo Kitabullah sifatnyo ubudiyyah.
singkek kato putusan kaji Adat lah tagak jo cupaknyo Syara' pun duduak jo syari'at punyo daulat masing-masing, walau bahinggo jo babateh Minangkabau bukan sekuler, Adat mairiang jalan Syara' satapak indak manyimpang sagarih pantang maranggang tunduak bak roda ka padati. itulah maksud bunyi undang "Syara' Mangato Adat Mamakai" Adat ureknyo di Agamo batang basanda ka Al Qur'an pucuaknyo tak tinggi dari sunah, itulah maknanyo "Adat Basandi Syara', Syara' Basandi Kitabullah" pasang sudah paku lah mati jadi pedoman salamonyo.
Namun jikok dicaliak lekok jo liku batamunyo Adat jo Syara' bukan tibo salangkah sampai indak rabah sakali pancuang masak alun sakali param, ajuak mahajuak dahulunyo ragu bacampua jo picayo dalam nan iyo baindakkan.
Alah kasifat dek urang awak dari dulu sampai kini bahwa inyo panyuko jo nan baru, akan tetapi indak garok cando tak harok tagak manyela-nyela mato gilo menilai jo manyimak, walau dipatuik lah katuju pandang lakek hati lah kanai namun dimuko alun kelihatan, pepatahnyo "digamak mangko dipacik dikunyah baru dilulua sabalum mahangguak ba antahkan" nyampang kok lah sudah usua pareso labo nampak rugi tak mungkin baru disinan baiyokan, artinyo : Extra hati-hati kritis teliti dan berparetongan.
Baitulah sikap urang awak manyambuik Islam dahulunyo, enggan, curiga, ragu-ragu kemudian baru baiyokan sampai mamaluak taguah-taguah.
