Buaian Sijundai Gasiang Tangkurak
—
Pincuran Gadiang lubuaknyo sati.
Lurahnyo dihuni urang bunian.
Gunuang Singgalang ba ula nago.
Jurangnyo dalam rimbo larangan.
Tasabuik setan si bujang hitam.
Suruhan jihin si rajo hawa.
Denai nyo sentak di tangah malam.
Ulah tangkurak namonyo gasiang.
Datang panyakik namonyo sijundai.
Ulah taraso kapalo paniang.
Tadanga urang maimbau denai.
Raso di lurah Pincuran Gadiang.
Dibaok angin nyo sayuik sampai.
Asok kumayan nan lah mambubuang.
Sinan nyo baka si jantuang pisang.
Sairiang salak anjiang maluluang.
Mangkuih ilimu si tujuah rajang.
Raso ka putuih hati jo jantuang.
Nyao di badan raso ka tabang.
Tujuah lapisan langik den jujuang.
Bumi den pijak raso tapanggang.
Ulah tangkurak namonyo gasiang.
Datang panyakik namonyo sijundai.
Tabang marayok mamanjek dindiang.
Kini malata di ateh lantai.
Runtuah lah iman hati bapaliang.
Kasiah nan indak dapek dilarai.
Ulah tangkurak namonyo gasiang.
Ulah tangkurak namonyo gasiang.
Ulah tangkurak namonyo gasiang.
Puah.....
Disalin dari kiriman FB: Sutan bandaro Sati
Foto: pinterest.com
